Number 5, jackson pollock, Creative Commons By SA

Jackson Pollock da artista baloratuenetako bat. Artea dirutan neurtuz gero, baloratuena. Bere ‘Number 5′ koadro abstraktuagatik 140 milioi dolar ordaindu zituen 2007an Mexikoko aberats batek. Artelan batengatik inoiz ordaindu den diru kantitaterik handiena, hain zuzen ere.

Pintura tantaka erortzen uzten zuen Pollock-ek ohialaren gainean. Dripping teknika horretan oinarritzen dira haren koadro asko eta asko, gerora, prezio pentsaezinetan saldu direnak.

Willem Kooning-en ‘Woman III’ koadroagatik 137,5 milioi dolar ordaindu zituzten 2006an. Historiako bigarren lanik garestiena da.

Woman III, Willem Kooning, Creative Commons By SA

Iragan asteazkeneko salmetak, Alberto Giacometti, hirugarren postuan utzi du. 75,5 milioi euroren truke eskuratu zuten Giacomettiren lana enkante batean.

L'Homme qui marche, alberto giacometti, Creative Commons By SA

Historiako artelanik garestienen zerrendan bina lan dituzten margolari bakarrak dira Gustav Klimt eta Pablo Picasso. Klimt-en Adele Bloch-Bauer-en erretratuagatik, 135 milioi dollar ordaindu zituzten. Hain zuzen ere, emakume beraren bi erretratu dira, Klimt zerrendan bitan atera arazi dutenak. Aipaturiko koadroa nazien eskutara ailegatu zen Bigarren Mundu Gerran. ‘Arte endekatua’ zen hura nazientzat. Azkenik Adeleren ilobari itzuli zioten artelana, eta Adele Bloch-Bauerrek, berriz ere, Klimt-entzako posatzea erabaki zuen. Emaitza, 87,9 milioi dolarretan saldu zen ‘Adele Bloch-Bauer II’ koadroa izan zen, zerrendako zazpigarrena, hain zuzen ere.

Adele Bloch-Bauer, Gustav Klimt, Creative Commons By SA

Adele Bloch-Bauer II, Gustav Klimt, Creative Commons By SA

Bosgarren postuan ageri da Picassoren ‘Niño con Pipa’ koadroa, eta seigarrenean ‘Dora Maar con gato’. 104,2 milioi dolar eta 95,2 milioi dolar ordaindu zituzten Malagako margolariaren bi lan horiengatik, hurrenez-hurren.

Niño con pipa, pablo picasso, Creative Commons By SA

Dora Maar con gato, pablo picasso, Creative Commons By SA

Francis Bacon-en ‘Triptych’-ek hartzen du zortzigarren postua, harengatik 86 milioi dolar ordaindu baitzituzten.

triptych, Francis Bacon, Creative Commons By SA

Vicent Van Gogh-ek Dr Gachet lagunari eginiko erretratuagatik 82,5 milioi dolar ordaindu zituzten 1990. urtean. Eta zerrendako azken postua Jasper Johns-en ‘False Start’-ena da, 80 milioi dolarretan saldu baitzuten.

Dr Gachet, Vicent Van Gogh, Creative Commons By SA

false start, Jasper Johns, Creative Commons By SA

Horiexek dira historiako artelanik garestienak. Garestiegi, edo merkeegi, artelanak, eroslea ordaintzeko prest dagoena balio du, dirutan behinik behin.