Merkel eta Sarkozy

Nicolas Sarkozy eta Angela Merkel Europako momentuko bikotea dira. Guztion ahotan daude eta bien argazkiek egunkarietako azalak betetzen dituzte ia egunero. Argazki kuttunak dira; baina, zoritxarrez, ez dira unean uneko hitzak jasotzeko gai. Horregatik, irudimen ariketa gogor baten ondoren, Nico eta Angieren argazkietako elkarrizketen edukia argitzea lortu dut. Hona hemen emaitza:

Merkel: Tira, Nico; goazen etxera, festa aspaldi amaitu da.
Sarkozy: Etxera?! Ez zaitez giro-izorratzailea izan, gaua bero-bero dago eta!

Merkel: Carla Bruniri muxu ematen berriro ikusten bazaitut, zin dagizut txiki-txiki egingo zaitudala.
Sarkozy: Lasai, maitea, lagun-minak gara bakarrik. Badakizu, itxura… Itxura zaindu behar dut Frantziaren hobe beharrez.

Sarkozy: Oi ene, Angie! Ez dakizu zenbat gustatzen zaidan horrelako gauzak belarrira xuxurlatzen dizkidazunean!

Merkel: Gaur ere zure gurasoen etxean bazkaldu behar dugu?
Sarkozy: Bai, baina lasai, Silvio ere gonbidatu dut otordua girotzeko.
Merkel: Ez dakit ba…

Sarkozy: Begira, Angie. Hortxe, errekatxo horren alboan eraikiko dut zuretzat Frantziako palaziorik dotoreena, o ene printzesa!

Merkel: Entzun al duzu Berlusconi horrek esan didana?!
Sarkozy: Bai. Lotsagabe hori… Lasai, ene maitea, oraintxe noa harekin hitz egitera. Egundoko jipoia emango diot eta ez da berriro horrelakorik esatera ausartuko.

Sarkozy: Aizu, Silvio! Kontuz gero nire neskari esaten diozunarekin!

Sarkozy: Ai ene, Angie! Jende honen guztiaren aurrean dantza egin behar al dugu?
Merkel: Zaude isilik, Nico, ederki ari zara eta!
Sarkozy: Zuk uste?
Merkel: Noski! Garaiera, oraingoan behintzat, zure garaiera alde duzu.

Sarkozy: Zure begiek Europako gaitz guztiak ahaztarazten dizkidate eta paradisurik basatienera eramaten naute.
Merkel: O, Niko! Hain zara samurra…! Muxuka nazazu!

Merkel: Nico, Nico, Nico… Gezurretan berriz ere?
Sarkozy: Kaka zaharra…! Ezin dizut ezertxo ere ezkutatu… Bai, egia da. Atzo Silviorekin izan nintzen berandu arte.
Merkel: Badakizu ez zaidala batere gustatzen gizon hori. Zenbat aldiz esan behar dizut?

Merkel: Zertara dator irribarre bihurri hori, maitea?
Sarkozy: Bart gauean zeneraman soineko sexi hori etorri zait burura.
Merkel: Nico, mesedez, gorde itxurak! Bileraren erdian gaude! Nire alproja kuttuna…

Merkel eta Sarkozy