Bildu lehendakarigai bila

2012-06-07 @ 12:47 Lukas Mateo

Patxi Lopezek behin eta berriz esan du ez dituela datorren urte hasierako hauteskundeak aurreratuko, baina, gauzak hartzen ari diren abiada ikusita, badirudi inork ez diola sinesten, izan ere, hautes-paperak egiteko lizitazioa ofizialki argitaratu denetik, pentsatzea libre da, Idoia Mendiak adierazi duenez.

Denak hasita daude labeak pizten edo, bederen, labeak berotzeko ikatza gertutzen. Badakigu PSE-EEk Lopez bera izango duela lehendakarigai, eta PPk Basagoitia. EAJk, ostera, ematen du Urkulluren bidea hobetsiko duela aurki. Kontua, beraz, Bilduren inguruan dago. Nor izango du ordezkari eta, batez ere, zer gertatuko da Sortu legeztatzen badute?

Bigarren galderatik txirikordatzen hasita, ematen du, Sortu legeztatu ala ez, koalizioan joango direla orain Bildu osatzen duten alderdi eta sentsibilitateetakoak. Deiak argitaratzen duenez, aditu talde bat jo eta fuego ari da hauteskundeetarako ezker-soberanistek eramango duten programa idazten. Aukera desberdinen multzo horrek,  Euskal Herria Bildu edo Euskal Herria Bai izango omen du izen. Biak ere EHB laburdurarekin. Igande honetan jakingo da hori.

Izanak izan, eta Otegi Bateragune auziaren kariz ezindua delarik, nor izango du lehendakarigai arragoa horretatik aterako den gaiak? Nork gidatuko du Ezker Abertzaleaz gain, EA, Aralar eta Alternatibak osatuko duten  gurdia?

Aipatu artikuluan Bildukoek diote, euren kezka ez direla pertsonak baizik eta programak. Baina hori egiazki horrela dela pentsatu arren, mundu guztiak daki Lehendakari batek nortasun handiko pertsona behar duela izan, eta Iñaki Antiguedad kendurik, ez dirudi beste inor nabarmentzen denik. Rufi Etxeberria, Barrena, Zabaleta, Ramirez, Matute eta konpainiak gehiago dirudite atzetik hariak mugitzen ibiltzekoak, oso aurrean agertzeko baino.

Nornahi delarik Bilduko lehendakarigai, gauza izan beharko du beste aukeretako politikariekin mintzatzeko eta, ahal izatera, akordioetara erakartzeko, inkesten arabera inork ez baitu nahikorik izanen bakarrik agintzeko.

Javier Nuñezek sinatzen duen artikuluan esaten da emakumezko bat izanen duela hautagai balizko EHB horrek, beste alderdiek egindako aukeretatik guztiz aldentzeko: “Si se mira al resto de partidos, el candidato del PNV va a ser Urkullu, el del PSE López y el del PP Basagoiti. Por nuestra parte no será un candidato en esa línea, con esas características“.

Eta gaineratzen da ez direla izango Maribi Ugarteburu edo Jone Goirizelaia…

Hala ere, badirudi asko baino gehiago dakiela Deiak, esaten baitu sektore nazionalistenak eta ezkerrekoenak kontsolatzeko norbait beharko duela izan, eta litekeena dela, Antiguedad bezala, unibertsitateko norbait izatea… Gaineratu horri Rufi Etxeberriak esan omen zuena: “Ez da Ezker Abertzaleko pertsona ezagun bat izango”, eta irudimena nahi beste luzatzeko aukera emango dizu.

Eta behin jolasean hasita, zergatik egin muzin harako beste zurrumurru hari, alegia, Bilduko batek baino gehiagok Koldo Saratxaga nahiko lukeela lehendakarigai ikusi.

Akabo! Ederra bota duguna! Baina nola liteke?

Segi dezagun jolasarekin:

  • Saratxagaren hautagaitzak EHBko jende andana poztuko luke, baina ez EHBkoak bakarrik.
  • Saratxagak ez luke balioko oposizioan geratzeko, bere profila gehiago baita teknikoa politikoa baino. Beraz, Lehendakari ala ezer ere ez.
  • Saratxagak aparato politikoekin tupust egiteko arriskua du, eta haien menpe ibili gabe, alde egiteko adorea aurrikusten zaio, baina jendaurrean ongi ikusia ere izan liteke hori..
  • Saratxagak errepaso handi bat beharko luke euskaltegian
  • Eta abar, eta abar.

Alderdiek landuko dituzte programak bai, baina, Saratxaga, Urkullu, Lopez eta Basagoiti, laukote hori horrela balitz, noren alde zauden badakigu: ez dago kolorerik.

 

 

Erotuko naiz, AdrianoAgulló, Creative Commons BY
RSS

Iruzkinak (16 iruzkin)

  1. iñaki

    Espainiak musika jarri orduko, gu dantzan hasi. Ederki gabiltza.

    • Ekiñe

      Zer esan nahi duk, Iñaki, Ezker soberanista ez litzatekeela hauteskundeetara aurkeztu behar?

      • iñaki

        aupa Ekiñe;
        Ez dut uste gure herriaren etorkizuna, horrelako sasi-gobernuetan jokoan dagoenik.
        Ez zait iruditzen garrantzitsua Urkullu edo Antiguedad “lehendakari” izatea. Agintea (benetako agintea) betikoen eskuetan dago eta Ibarretxe berri batek ,izan ar ala izan eme, ez ditu aurretik lehendakari izan direnen markak hobetsiko.Aldiz, uste dut behin eta berriro gure gabezi politikoak, boto pilaketa batekin estali nahi ditugula.
        Euskaldunok ez dugu gobernurik ,eta horrek mugiarazi beharko gintuzke . Gainera ez al zegoen hilda bide autonomista edo behintzat autonomi estatutua ?

        • Ekiñe

          Neurri batean ados nagok esaten duanarekin, gure herriaren etorkizuna ez zagok EAEko txiringitoa kudeatzean. Dena dela, ez diat uste EAE kudeatzera mugatzen denik ikuspegia; helburua izan beharko lukek ahalik eta erakunde gehien burujabetzaren bidean lagungarri izatea (eta dirua, ez ahaztu ezinbestekoa dela): batetik, udalak, kantonamenduak, aldundiak eta autonomia erkidegoak, eta, bestetik, udalbiltza eta horrelakoak. Jakina bide autonomista hilda dagoela, baina ez duk gauza bera EAEn Urkullu lehendakari izatea, Lopez, Basagoiti edo ezkerreko abertzaleren bat. Zeren eta, zertarako nahi dugu independetzia, lortzen dugunerako herria erdaldunduta, erraustuta eta abiadura azkarrak eramanda baldin badago?
          .
          Niri ere beldur ematen zidak instituzionalizatze bide horrek, arrisku handia dik, baina ez genikek baztertu behar, bestelako borroken osagarri modura ikusi baizik (desobedientzia eta nazio eraikuntza, batik bat). Bestela, zein bide iruditzen zaik egin beharko genukeela? Udalbiltza moduko batek independentzia aldarrikatu? Hauteskunde autonomoak (ez autonomikoak) antolatu? Denok armatan altxatu?

          • Mikel

            Aupa Ekiñe.

            Etsaiak jarritako eta baimendutako instituzioak, beldurra emateaz gain, ez digute inoiz balio izango gure estatua berreskuratzeko. Urte asko daramatzagu instituzio horiek kudeatzen eta, nik dakidala, euskararen egoera, adibidez, ez da gehiegi aldatu (ertzaintza, osakidetza, oposaketak, eta abar). Gakoa ez da, nire uste apalean, instituzio horiek zeinek “gidatzen” dituen, baizik eta benetako gidaritza non dagoen. Instituzio horien erabakien gainetik, benetako eta azken erabakia non dagoen soberan dakigu.
            Instituzio horiek soilik izango zaizkigu baliagarriak, nire ustez, guk gidatuko dugun eta arerioak errekuperatu ezingo duen (udalbiltza desegin/errekuperatu egin zuten)erakunde propio bat sortzeko balio diguten neurrian.
            Beste guztia errekuperagarria da eta ez du merezi. Erakunde propio hori nola sortu da gakoa baina, horretan lan egin nahi duenak badaki nora jo.

            Laster arte.

          • iñaki

            1- motibazioa.
            2- ezagutza.
            3- erabilpena.

            Eta ez bakarrik hizkuntzaren berreskurapenean, maila politikoan ere bai, noski.

          • Ekiñe

            Mikel, lehen ere izan diagu errekuperagarria ez zen erakunde bat, eta, hala ere, euskararen egoera hik esaten duan horixe duk. Estatu bat eraikitzeaz ari gaituk, ez masoien moduko gizarte itxi eta ezkutuko bat. Estatuak hazia behar dik, denek onartuko duten abiapuntu bat. Ez diagu estaturik eraikiko biztanleen hiru laurdenei bizkarra emanda. Zoritxarrez, horrela duk. Nik ere jarriko nikek dekretuz euskal estatua, dagokigulako, gurea delako eta kitto; baina horrek, jendearen nahiaren kontra eginda, ez likek ibilbiderik izango.
            .
            Iruditzen zait, Mikel eta Iñaki, borondate ona eta handia bai, baina bide argirik ez duzuela. Bide bat kritikatzea ongi dago, baina, alternatibarik eskaini ezean, ez darama inora, etsipenera ez bada.

          • iñaki

            Zure zalantzen harira, gaur Berrian artikulu interesgarria Mikel Antza Orreagako kidearena ;

            http://paperekoa.berria.info/iritzia/2012-06-09/006/002/municheko_paktua_1962_eta_gernikako_akordioa_2010.htmkidearena.

          • Ekiñe

            Ba, Iñaki, sentitzen diat esatea, baina ez zidak ezer argitu.
            .
            Eztabaidarekin segitu aurretik, argitu nahi diat ulertzen dudala eztabaida ezin egin izatea behar den moduan, debekatuta dagoelako. Hala ere, debekuen gainetik egin genian eztabaida bat. Gure herrian, behintzat, mundu guztiak ahobizarrik gabe hitz egin zian.
            .
            Subjektu politiko indartsu bat behar diagu (nolabaiteko estatu edo gobernu errekuperaezin bat, ulertzen dudanez). Ados nagok. Erabat. Kontua duk hori nola lortu. Eta nire ikuspegitik, Gernikako akordioa ahalegin bat duk galtzen ari ginen indar hori berreskuratzeko. Gure ahuldadea nabarmena zuan subjektu errekuperaezinak Espainiarekin egindako negoziazioetan. Eta gero eta ahulago, eta gero eta lagun gehiago kartzelan, eta gero eta langile gutxiago kalean, eta gero eta zatiketa handiagoa gure artean, eta gero eta…
            .
            Nola lortu subjektu hori? Zer kalte egiten ziok hauteskundeetan parte hartzeak beste horri? Ez al dugu orain arte ere hauteskundeetan parte hartu?
            .
            Nik argi diat: gaur ezker abertzaleak daraman ildoa ez duk nik nahi nukeena; udaletan piperpotoak jasaten segitu behar izatea, adibidez, onartezina duk; eta, horren aurrean, desobedientzia eta nazio eraikuntza planteatzen diat, Udalbiltzaren ildoa, EHren eskubideen karta, EHNArekin bizi, eragozpen fiskala… hots, gure belaunaldikook intsumisioa eta autogestioa deritzeguna (eta sasitik egin behar bada, sasitik izan dadila). Baina ez harririk bota geure teilatura; harriak galtzada izan zitezkeen, baina oztopo bihurtu dituk bidean.
            .
            Kontua duk mahai batean esertzerakoan indarrarekin joatea, buruz buru. Hori nola lortu nahi duk? (Erantzun argirik gabe segituz gero, ulertu dudala pentsatuko diat).

          • iñaki

            “Gure ahuldadea nabarmena zuan subjektu errekuperaezinak Espainiarekin egindako negoziazioetan. Eta gero eta ahulago, eta gero eta lagun gehiago kartzelan, eta gero eta langile gutxiago kalean, eta gero eta zatiketa handiagoa gure artean, eta gero eta…”
            Zure azterketarekin ados nago. Etsipenak jende asko eraman du bide autonomistara, baina bide autonomistaren porrotak batzuk eramango ditu berriro tremendismo nerabera.
            Batak bestea elikatzen du. Honen inguruan hausnarketa sakona hemen:http://www.osoa.net/
            Beste bat arte.

          • Ekiñe

            Espainiera ulertzeko zaila egiten bazait ere, argixeago zagok, bai. Eskerrik asko estekarengatik. Galdera, ordea, airean zagok oraindik: nola?
            Hurrengo arte.

        • Amonamantangorri

          Haratx zer idatzi zuen Lenin kamaradak “ezkerreria, komunismoaren haur-gaixotasuna” saiakeran. Barkatu, oraintxe ez dut eta euskaratzeko denborarik. “Terriblemente revolucionarios” beharrean jarri “superabertzale”, “influencias burgesas” beharrean “españolistak”, “movimiento obrero” beharrean “askapen nazionaleko mugimendu”, eta hola.
          “Vosotros, queridos boicotistas y antiparlamentarios, os creéis “terriblemente revolucionarios”, cuando en realidad estáis asustados de las dificultades relativamente pequeñas de la lucha contra las influencias burguesas en el interior del movimiento obrero, cuando vuestra victoria, es decir, el derrocamiento de la burguesía y la conquista del Poder político por el proletariado, creará estas mismas dificultades en una medida aun más grande, incomparablemente más grande. Os habéis asustado como niños ante la pequeña dificultad que se os presenta hoy, sin comprender que mañana y pasado mañana os veréis obligados, a pesar de todo, a aprender, y aprender bien, a vencer esas dificultades en proporciones incomparablemente mayores”.

          • iñaki

            Hara beste kamarada batek esandakoa ;
            “En acceptatnt de jouer le jeu du scrutin democratique, le parti communiste a cessé d’être revolutionaire.
            Tout adversaire de la Republique qui se plie aux règles de nos institutions, les renforce.

            N. Sarkozy

  2. Amonamantangorri

    Emakume bat izanen dela esaten dabiltza aspalditik. Maribi ez baldin bada, igual Marije izanen da. Ez duzue aipatu.

    Azkeneko partea ez dut ongi entenditu: Saratxagaren soslaia “teknikoa” baldin bada “politikoa” baino gehiago, lehendakarigaien kinielatik automatikoki baztertua egon behar luke. Horrelako jendea ez al da maiz egoten sail bat edo hortik beherako departamentu bat gidatzen? Hori da gobernuetan “independenteek” eta “teknikoek” bete ohi duten lana.

  3. Lukas Mateo Lukas Mateo

    Txorrotxioak ekarri zizkigun txori berak, prezio berean dio orain Saratxagaren hautuak ez dirudiela egingo duenik aurrera. Ez digu esan zergatik.

  4. talamendi

    Hurrengo lehendakarigaia, aurrerakoi muturrekoa beharko luke ( emakumea, beltza, porreta, bisexuala…) lehendakari progre-postalekoa alegia.

Idatzi hemen zure iruzkina

Zure e-posta helbidea ez da argitaratuko. Beharrezko eremuak * markatuta daude