zuzeu.com » Tolosaldeko Euskararen Semaforoa

Euskarazko hedabideak hobeak dira erdarazkoak baino?

Tolosaldeko Euskararen Semaforoa — Tue, 11 Oct 2011 08:45:22 +0000

Euskarazko hedabideak hobeak al dira erdarazkoak baino? Galdera horri erantzun argia eman dio Maria Gonzalez Gorosarri kazetari eta ikertzaileak: “Bai, hobeak dira”. Begira zer dioen Gonzalezek:

“Hobeak dira euskarazkoak, eta hori frogatu nahi nuen. Horretarako, hedabide bakoitza bere herrialdean erdaraz gehien zabaltzen den komunikabidearekin konparatu nuen”.

“XXI. mendean dagoen oinarri ustela da euskarazko albisteak kalitate txarragokoak direla. Uste ustel horri aurre egin diot”.

(Berrian, 2011-06-24)

Hobeak izanik ere, ez du ematen euskaldunon kontsumo ohiturek euskarazkoak lehenestera jotzen dutenik. Euskaldunok gehiago irakurtzen/entzuten/ikusten ditugu erdarazkoak. Orduan, ez ditugu hobeak irakurtzen/entzuten/ikusten?

Emankizun berbera euskaraz edo erdaraz ikusteko aukera dugunean ere, erdarara jo izan dugu, Koldo Aldalur kazetariak jakinarazi duenez:

“[Txapeldunen Ligako] Finala batera eta antzeko baliabideekin eskaini zuten TVE1ek eta ETBko lehen kateak. Euskal Autonomia Erkidegoan audientzia datuak honakoak izan ziren: gaztelaniazko emanaldiak %54ko sharea, euskarazkoak %4,9koa. Raitinga, emanaldia zenbatek ikusi zuten alegia, 30.000 bat lagunek “gure hizkuntzan”. Gaztelaniaz zenbatek ikusi zuten zeuek atera kontuak, niri lotsaren lotsaz matrailak gorritzen zaizkit eta!”

(Argia, 2011-07-24)

Guk inkesta egin nahi dugu, zure iritzia jasotzeko: Hobeak dira euskarazkoak? Bai? Ez? Horregatik irakurtzen/entzuten/ikusten ditugu? Edo alderantziz?

Inkesta bete nahi baduzu, jo Semaforora eta bozkatu.

Eta gaiak gogoetarik sortzen badizu, bidaliguzu:

- Posta elektronikoz: euskararensemaforoa@gmail.com
- Facebook bidez
- Semaforoan sartu eta erantzunetan zure ekarpena egin.

Parte hartu!

Gaiarekin zerikusia duten beste albiste batzuk:

- ETB1. Kalera bere defentsan (Ramon Labaien, Irutxuloko Hitzan, 2011-09-08)

- Euskarazko hedabideak, beste jauzi baterako ordua (Hainbat hedabidek, Semaforoan)

- Napartheitb gehiagorik ez! (Eneko Gotzon Ares, Semaforoan)

- Maixol Arregi, ETB1en azken mohikanoa (Martin Kitto, Semaforoan)

Albistearen jatorrizko bertsioa ikusi nahi baduzu, jo Tolosaldeko Euskararen Semaforora!

Zinemaldia eta euskara. Zer daukagu esateko?

Tolosaldeko Euskararen Semaforoa — Thu, 29 Sep 2011 06:56:32 +0000

Euskarak presentzia du Zinemaldiko ekitaldi gehienetan. Jendaurreko tratuan ere, euskara harreman hizkuntza da. Eta bestelakoetara oso ohituta gaudenez euskaldunok, paradisua bailitzan hartzen dugu Zinemaldia. Irla bat, non euskaldunoi euskaraz erantzuten zaigun, non ekitaldi bakoitzaren lehen hitza euskaraz egiten den, non euskaldun bezala errespetatuak sentitzen garen.

Gure inozentzia ordea, berehala zapuzten da ikusten dugunean Australiatik etorritako kazetari begi-urdinari, ondoko leihatilan, guri bezain abegikor eta sinpatiko erantzuten diotela bere hizkuntzan. Eta berdin produktore frantses bati, eta berdin Malagako zinema jaialdiko arduradun bati. Eleaniztasun orekatua da hori.

Zinemaldian lau hizkuntza nagusiek (euskarak, gaztelaniak, ingelesak eta frantsesak) izan behar duten espazio, garrantzia eta denbora neurtua dago, neurtuegia, akaso. Euskal Herrian egoera ezberdina bizi duten hizkuntzentzako, trataera berdina.

Maialen Lujanbiok Euskal Herriko Bertsolari Txapelketako finalean kantatu zuen bezala, Donostiako Zinema Jaialdia ez dago “euskaratik eta euskaraz” pentsatuta. Bere nazioarteko dimentsioa ikusita, susmoa dugu, antolatzaile taldeak ingelesa erabiliko duela nagusiki. Eta tristea da esatea, baina Zinemaldia gaztelaniaren inguruan ardaztuta ez egoteak bermatzen dio, hain juxtu, euskarari, besteen pareko presentzia.

Hori Zinemaldiak kanpora begira daraman hizkuntza politikari dagokionez esan dezakeguna. Beste hainbat ertz ere baditu jaialdiak, euskaldunontzat batere borobilak ez direnak. Filmen promoziorako eta salerosketarako balio izaten du astebete irauten duen ekitaldiak. Zurrunbilo horretatik urrun ibili garen arren, kanpotik begiratuta, ez dirudi zirkuitu horietan euskara batere entzun denik. Euskara ez da, itxuraz, propagandarako eta salmentarako hizkuntza. Balio erantsirik ez du.

Bitxia egin zaigu Euskal Herritik kanpoko kazetariek euskararekiko agertu duten jarrera. Haientzat Zinemaldian entzun litezkeen hamarnaka hizkuntzetatik “beste bat” da euskara. Errusiera, japoniera, alemana, arabiera, portugesa edota turkieraren pareko; Baina bisitatzen ari diren toki horretako bertako jatorrizko hizkuntza denaren arrastorik ez.

Bien bitartean, ez ditugu ahaztu nahi aurtengo edizioan aurkeztu diren euskarazko filmak: “Urte berri on, amona!”, “Bertsolari”, “Bi anai” … Baina horietako batean jarri nahi dugu arreta: “Arriya” pelikulan. Guk ahotan ibili dugun gaiaren inguruan gogoeta egiteko gonbita egiten digu. Gai asko ageri dira filma horretan eta horietako bat hizkuntzen erabilera bera da.

Badugu zeregina oraindik euskara lehen planora ekarri, Zinemaldiko izar protagonista bihurtu eta alfonbra gorrian paseatzen jarri nahi badugu. Lehen pausoa izan liteke Gaztelun bizi den Jose Luis Rebordinos Zinemaldiko zuzendariak hartu omen duen erabakia. Off the record jakin dugu, AEKra gerturatu dela irakasle eske euskara ikasteko. Bejondeiola!

Osakidetza eta euskara: zer gertatzen ari den ulertzeko “pista” batzuk

Tolosaldeko Euskararen Semaforoa — Wed, 03 Aug 2011 06:57:41 +0000

Osakidetzak 2.600 lanpostu atera ditu azken lan eskaintza publikoan, eta eragile politiko batzuek (LAB, Aralar, EA eta EAJ tartean) salatu dute deialdiak euskaldunen hizkuntz eskubideak urratzen dituztela. Egia ote?

Semaforoaren Ikerketa Batzordeak gaiari heldu dio, eta mendi buelta egin gabe eta hondartzara joan gabe geratu da, gaiaren gaineko datuak biltzen, galdera hauei erantzunak bilatu nahian:

Zergatik aldatu dituzte azterketa eta puntuazio ereduak? Euskaldunentzat kaltegarria al da aldaketa?
Azkarregi al doa euskara Osakidetzan? Zer diote Osakidetzak berak egindako txostenek euskararen egoerari buruz?
Hizkuntza garrantzitsua ez bada, zergatik ez kontratatu mediku ingelesak?
Zer gertatuko da etorkizunean? Nola daude gauzak medikuntza ikasleen artean? Gero eta mediku euskaldun gehiago izango ditugu?
Zergatik sartu digute halako albiste bat udan? Ezkutupean pasatzea nahi dute?

Zer gertatzen ari den ulertzeko pista batzuk nahi badituzu, egin klik hemen

Hautetsiak eta prentsaurrekoak: ze hizkuntza erabili beharko lukete?

Tolosaldeko Euskararen Semaforoa — Thu, 21 Jul 2011 07:57:59 +0000

Soka luzea ekarri dute Martin Garitano Gipuzkoako ahaldun nagusiak eta Ana Carrere Andoaingo alkateak euskaraz egindako prentsaurrekoek. Zenbait kazetarik jarrera hori salatu dute; adibidez, Isabel Landak, El País egunkarian edo Periodista Digitalek.

Zer iritzi duzu zuk? Ze hizkuntzatan egin beharko lituzkete prentsaurrekoak Tolosaldeko alkateek? Sartu Semaforoan eta bozkatu!

Hona hemen gaiarekin lotutako beste iritzi batzuk:
- Noentiendotarrak euskarako prentsaurrekoak salatzen ari dira (Semaforoan)
- “Gure kargu publikoen hizkuntza publikoaz”, Bittor Hidalgo (Zuzeun)
- “Euskara politikarien ahotan”, Ana Urkiza (Deian)
- “Uda on / Buen verano”, Xabier Euzkitze (Noticias de Gipuzkoan)
- Gari Araolazaren aholkua (Twitterren)

OHARRA: Inkesta abuztuaren 26an itxiko dugu. Ordenagailu bakoitzetik behin bakarrik boztatu ahal izango duzu.

AUKERATU ERANTZUNA ETA BOZKATU!

Movistarren arreta zerbitzua: atenditzen dute euskaraz?

Tolosaldeko Euskararen Semaforoa — Thu, 14 Jul 2011 08:05:46 +0000

Zenbateraino errespetatzen dituzte telefono konpainiek euskaldunak? Askotan lau haizetara zabaltzen dute euskaldunekin telefonoz hitz egiteko euskaldunak jartzen dituztela, baina egia al da hori? Movistarrek egindakoa dugu hizpide artikulu honetan.

Mikel Alberro donostiarrak telefono konpainiak jarri ditu euskaldunon begipuntuaren xedean. Berrian argitaratutako gutun batean, Movistarrek euskaldunekin duen jarrera salatu du. Hona hemen pasarte bat:

“Movistar konpainiak euskaldunok 3. mailako bezeroak garela agerian utzi dit gaur. Izan ere, 1004 telefonora deitu dudanean nire sakelako telefonoaren azken fakturari buruzko informazioa jasotzeko, aukera eman didate zortzi hizkuntzatan mintzatzeko (tartean katalana eta galegoa), baina ez euskaraz”.

Idatzi osoa irakurri nahi baduzu, egin klik hemen.

Ez da aurreneko aldia prentsaren bidez Movistar salatzen dutena. Duela bi urte, euskara ez zela hizkuntza esan zioten Joanes Aleman bezeroari, eta hark Diario de Noticiasen salatu zuen. Artikulua irakurri nahi baduzu, egin klik hemen (gaztelaniaz dago).

Halakoak ikusirik Semaforoak Mikel Alberroren salaketaren berri eman du Movistarren foroan, eta iragarri digute mezua ezabatu egingo dutela, euskaraz zegoelako, eta honako hau jakinarazi digute:

“Buenos dias”

Disculpa que hayamos tenido que eliminar tu post en este foro pero lamentablemente no disponemos de moderadores que hablen euskera. No obstante y en referencia a tu consulta ( la he traducido parcialmente con un traductor on line), comentarte que pese a que es posible que al llamar al 1004 no hayas escuchado la locucion para que eligieras ser atendido en euskera, si que disponemos de operadores que te pueden atender en tu lengua , lo que tienes que hacer es simplemente pedirle al primer agente que te atienda que te transfiera con un agente que hable euskera ,y que si no me equivoco incluso puede dejar configurada tu linea para que la proxima vez que llames al 1004 seas atendido directamente en tu lengua”.

Beraz, Movistarrek dio baietz, badutela euskaraz atenditzeko langilerik. Egia ote?

Semaforoak dei egin nahi die Movistarren bezero euskaldunei 1004ra deitu eta euskarazko tratua eskatzeko eta gertatzen dena guri kontatzeko: euskararensemaforoa@gmail.com.

Telefono konpainiekin lotutako beste albiste hauek ere jarri ditugu Semaforoan:

- Telefono konpainiak eta euskara: denak ez dira berdin

- Euskara eta telefono konpainiak (II): ezetz, denak ez direla berdin!

- Telefono konpainia zigortu eta bezero euskaldunari arrazoia eman diote epaitegian

- Orange laranja da, baina guk gorria eman diogu

Semaforoak esana: “Ertzain hauek ere Herri Urratsera joan beharko lukete”

Tolosaldeko Euskararen Semaforoa — Tue, 03 May 2011 11:10:10 +0000

Seaskaren ikastolen egoera larria da oso, larunbateko manifestazioa horren adierazgarri. Horregatik Tolosaldeko Euskararen Semaforoak aparteko ahalegina egin du, euskaltzale guztiei dei egiteko Herri Urratsera joateko.

Semaforoaren Umore Onaren Batzordeak esketx bat grabatu du, aurten ere Senpereko lakura joateko. Esketxa entzun aurretik, ordea, albiste hau irakurtzea komeni da: Ertzaintzak telefono bidez itzulpenak egiteko zerbitzua bultzatuko du atzerritarrak artatzeko.

"5.000 baietz", zertarako behar dira?

Tolosaldeko Euskararen Semaforoa — Tue, 29 Mar 2011 07:16:01 +0000

Zertarako izan behar dugu/dute bost mila? Txori txiki batek esan digu kartelen atzean euskararekin lotutako zerbait dagoela.

Zer ote?

“Apirilaren 12tik aurrera” ere jartzen du kartelean. Ordurarte itxoin beharko dugu zer den jakiteko?

Zer da "normaltasuna" Eroskirentzat eta FNACentzat?

Tolosaldeko Euskararen Semaforoa — Tue, 22 Mar 2011 11:04:01 +0000

Semaforoaren lagun batek salatu duenez, Eroskik euskarazko kultur produktuak baztertzen ditu idatzizko propagandan. Normala da?

Santi Leonek honako hau kontatu digu Berrian: “Fnacen sartu ginen. DVDen apalategietan, balizko bezeroa gidatzeko asmoz, honako sailkapen hau: «Cine español / zinema nazionala». Sintagma sinpleenetan ere, nonbait, posible da itzulpen librea, eta hemen esaldiaren euskaratzaileak bere baratzeko porruekin maneatu du euskal bertsioa. Kontrakoak ez nindukeen hainbertze harrituko”. (“Normaltasuna” izeneko artikulutik).

Zer da “normaltasuna” saltoki handietan? Zer da “normaltasuna” Eroskirentzat eta FNACentzat? Euskara normala da? Euskalduna normala da?

Gipuzkoan ez dago bermerik gidabaimeneko azterketa praktikoa euskaraz egiteko

Tolosaldeko Euskararen Semaforoa — Thu, 10 Mar 2011 05:55:01 +0000

Hona hemen zer gertatu zitzaien azterketa praktikoa euskaraz egin nahi izan zuten batzuei, aste bat lehenago euskaraz egin nahi zutela jakinarazita: “Aztertzaileak bi aukera eman zizkiean euskaraz egin nahi zuten hiru laguni: gaztelaniaz egin edo etxera joan. Hori bai, dena edukazio onez eta errespetuz. Azkenean, gaztelaniaz egin zitiztean azterketa praktikoak”.

Joxe Luisek Semaforoari kontatutakoa ikusteko, egin klik hemen.

Horrela erdalduntzen dira euskaldunen eta erdaldunen arteko elkarrizketak

Tolosaldeko Euskararen Semaforoa — Tue, 01 Mar 2011 18:11:01 +0000

Hori hala izanik, hauxe da euskararen etorkizuna lagun taldean, goiko eskeman ikus dezakezunez:

- 10 elkarrizketatik 4 euskaraz izango dira, eta 6 erdaraz, baldin eta euskaldunek euskaldunekin euskaraz jarduten badute.

KONTUZ! Hizkuntza bat nola gal daitekeen erakusteko adibide praktikoa da hau. Euskarari BAI esatea ez da nahikoa, euskaldunok erabili eta besteok ikasi behar dugu, etorkizunean euskaraz bizi nahi badugu.

Jatorrizko albistea ikusteko, egin klik hemen.