Gaur Interneten Eguna ospatzen da nazioartean. Badakigu egunero edo ia egunero posta elektronikoa begiratzen duzula, edota sarea arakatzen duzula informazio edo albisteen bila (eta nola, ez, ZuZeu bisitatzen duzula). Baina, zer dakizu internet eta sareari buruz? Hona hemen galdera-erantzun sorta; proba egin nahi?

Joseba Beloki (Lazkao, 1973) txirrindularia aski ezaguna da gure lurretan, baita kanpoan ere. Jaiotzez gipuzkoarra izanagatik, Gasteizen bizi da haurra zenetik. Palmares ederra lortu zuen urte gutxian, 2000tik 2002ra Pariseko podiumera igo zen, bitan brontzezkoa eta azkenekoan zilarrezko domina lortuz. Espainiako Itzulian ere hirugarren lekua lortu zuen 2002 urtean. Frantziako Tourrean sorpresa pozgarria izatetik garaipena lortzeko faborito izatera igaro zen denbora oso laburrean.

Baina, egin zituen lasterketa izugarriak gorabehera, Lance Armstrong estatubatuarraren itzalean mantendu zen beti. Euskaldun gazteak, ordea, ez zuen etsi eta gogor entrenatu zen 2003 urtean Armstrongi koroa kentzeko . Alpeetako mendietara nor baino nor heldu ziren, eta La Rochetteko etapan 40 segundura jarri zen. Inoiz baino hurbilago, hatsa Amstrongen atzeko gurpilean. Zoritxarrez, ordea, uztailaren 14 hura, txirrindularitza zaleek inoiz ahaztuko ez duten eguna bilakatu zen. Bihurgune batean irrist egin eta lurra jo zuen Joseba Belokik, eskumuturra, izterrezurra eta ukondoa hautsiz. Joseba Belokiren ibilbide profesionalaren amaieraren hasiera izan zen hura.

Kolpe fisiko eta psikologiko horretatik ez zen guztiz osatu eta itzultzeko saiakerak egin bazituen ere, erorialdia eta lau urte geroago, 2007 urtean, txirrindua utzi zuen. Denbora tarte horretan, gainera, dopin iskanbila baten barruan aurkitu zuen bere burua, Puerto Operazioan, alegia. Arazoak pilatu zitzaizkion eta goi mailako txirrindulariak ez zuen podiumetara itzultzeko indarrik izan. Gainera, txirrindularitzaren negozioa modu gordinean ikusten zuen dagoeneko. ”Betidanik esan dut txirrindulariak zirku bateko pailazoak besterik ez ginela”, esan du elkarrizketan.

Agur esan zuen egunean ezkor baina ziur adierazi zuen: “Txirrindularitza heriotzaren bidean doa gutxinaka”. Ordutik bost urte igaro direnean Joseba Belokik (@josebabeloki) bere egunerokoa, iragana eta iritziak kontatu dizkigu. Elkarrizketa bezperan Mallorcan zegoen zikloturisten lasterketan parte hartzen.

• Orainaz: “Askotan erraza da pantaila aurrean zer gertatuko den jakitea”

Kirola egiten segitzen duzu?

Bai. Azken finean orain arte kirolari profesional izan naiz, eta, orain, zikloturista bezala nahikoa konpromiso ditut urtean zehar. Korrikan ere ibiltzen naiz, Gasteizko Prado parkea da nire entrenamendu lekua. Atletismoa ere gustatzen zait, New Yorkeko eta Berlingo maratoietan hartu dut parte. Azken finean, kirola egin eta osasun aldetik fin mantentzea nahi dut.

Erronkak dituzu egiteke?

Bai noski. Nik uste erronkak askotan positiboak direla. Helburu bat jarriz gero eguneroko entrenamendua egiteko beharrean ikusten zara. Bestela, etxera nekatuta heltzen zarela zaila izaten da. Erronkek motibazioa ematen didate eta ondo sentiarazi. Baditut hurrengo hilabeteetarako hainbat erronka buruan.

Zein lan egiten duzu bizikleta munduan?

Ciclismo a fondo aldizkarian parte hartzen dut eta iritzia ematen dut hor. Txirrindulari ohiekin biltzen naiz sarritan egoerari buruzkoez hitz egiteko. Azken batean bizikleta munduarekin zerikusia izatea nahi dut. Horrez gain, asko gustatzen zait irratia eta Radio Euskadin ere lasterketak kontatzen ibiltzen naiz.

Nola bizi dituzu lasterketak telebistatik?

Oso desberdin. Zu txirrindulari zarenean ez duzu telebistan ikusten den ikuspuntu zabal hori. Askotan erraza da pantaila aurrean zer gertatuko den eta bakoitzari zer gertatuko zaion jakitea. Baina, ezin da ahaztu gu ere bertan izan garela eta askotan ez dela erraza erabaki onenak hartzea. Urduri ere jartzen naiz askotan. Karrera interesgarriak direnean jende ezaguna eta lagunak hor ikusita nahiak eta bihotzak ere alde baterantz egiten du.

• Haur garaiaz: “Testu liburu gehienek bizikletak dituzte hor zehar margotuta”

Noiz izan zenuen lehen bizikleta?

Beasaingo festetan jarri zuten tonbola baten bizikleta gorri bat. Koadrila osoak eta senitartekoek boletoak erosi zituzten, eta han hasi zen dena. Hiru bat urte nituen orduan. Istorio polita da: Beasaingo Arana kalean batera eta bestera ibiltzen nintzen eskuko balazta gabeko bizikleta hartan. Arraro xamarra zen txirrindua baina lortu nuen nire buruan konfiantza. Pixkanaka pixkanaka handituz joan, eta orain arte, kar, kar.

Eskolan ikasle ona al zinen?

Eskolan nahikoa alferra nintzen nahiz eta gauzak azkenean ateratzen nituen. Baina, etxean banuen giro txirrinduzalea, eta hori barneraino eraman nuen. Nire txikitako testu liburu gehienek bizikletak dituzte hor zehar margotuta.

Nortzuk ziren zure txikitako idoloak?

Marianista izan naiz betidanik. Cabestany ere bai, baina nire etxean beti Jokin Mugika. Askotan esaten dut nire aita baino zale handiagorik ez duela Mugikak izan. Geroago izan dira gehiago, LeMond, gero Indurain etorri zen. Gainera, kirol bizitzan inportantea izan zen Indurain, eta pertsonalki ezagutu ditudanean, Mariano eta Indurainekin gelditzen naiz.

• Profesional garaiaz: “Ez zen nahikoa Armstrongek egun txar bat izatea”

Zerk ematen dizu lasterketan indar gehiago: buruak ala hankak?

Beti burua. Kirolari profesional batek burua ez badu ondo, segundu bakar batez bada ere, gorputzak ez du funtzionatzen. Garai onenetan burua behar izan genuen aurrera pausoa emateko, baita atzera emateko ere.

Noiz duzu podium gainean oroitzapen onena?

Zalantzarik gabe, 2002 urtean taldeko kronoa irabazi genuenean, ONCErekin Tourrean. Izugarri polita izan zen hori. Parisekoak ere bai, Festinarekin igo nintzenean. Ez naiz gogoratzen, ordea. Egia esan, lehenengo aldi hura estalita dut, nerbioak jota egon nintzen eta. Besteak bai.

Zenbat aldiz pentsatu zenuen: Armstrong txatxu hau hemen egon ez balitz…

Armstrong egon ez balitz Jan Ullrich ere bazegoen. Lehenengo urtean nire asmoa Tourrean kideak laguntzea zen, eta etapak pasa ahala postu onean kokatu nintzen eta ezin izan ninduten handik kendu. Behin ONCEn nengoela pentsatzen genuen nola arraio kendu 11 minutu Lance Armstrongi. 2003 urtean ikusi genuen Tourra irabazteko aukera genuela. Gertu egon ginen, baina aurreko urteetan ez. Armstrongekin ez zen nahikoa hark egun txar bat edukitzea, bi edo hiru behar zituen txarrak zuk gainditzeko. Akatsik ez zuen: ikaragarrizko taldea, etapetan nahi zuena egiten zuen… Guk bagenuen talde ona, baina harek beti zituen taldeko bost aldapan gora laguntzen.

Erori zineneko etapa hura nola gogoratzen duzu?

Beldurrik gabe heldu ginen zenbait txirrindulari. Jan Ullrich, Iban Mayo… Gainera, ikusi genuen Armstrongek ez zuela aurreko urteetan bezain bloke gogorra taldean. Alpe D’Huezen lur jota utzi genituen, ikusi genuen ez zuela hainbeste lagun Armstrongek eta ez zituela jarraitzen ihesaldian zeuden txirrindulari denak. Hain ondo ez zegoela pentsatu genuen! Azkenean, Tourra irabazi egin zuen, baina minutu bateko diferentziarekin. Aukera ona galdu genuen orduan.

Erori eta berehala taldekideak laguntzeko gelditu egin zirela azpimarratu ohi duzu.

Pertsona harremanaren balioak erakutsi zizkidan horrek. Beraiek niretzat ari ziren lanean, eta, sarritan, lan protokoloa izaten da hori, talde estrategia eta kitto. Erorketa pasa eta gero ikusi nituen detaile horiek, ez zirela lankideak bakarrik, lagunak ere bai, horrek balio handia izan zuen.

Une gogorrak izan zenituen horren ostean, ezta?

Goi mailako kirol bizitza amaitu zitzaidan niri une horretan. Protesia jarri zidaten, operazioak han eta hemen, errenka eta makuluekin ibili behar nintzen. Hori ulertzea, psikologikoki ez da erraza. 2004ko tourra ikusi nuen gorputza minduta nuela, jakinda aurreko urtean irabazteko borrokan egon nintzela. Psikologikoki oso gogorra izan zen. 2003 urtera arte izandako ilusioak eta emaitza onak ikusita, ikusten duzu kirol bizitza gora doala, eta bihurgune batean dena pikutara…. Ba pentsa.

• Ibilbide profesionalaren amaieraz: “Gorputz aldetik nioena baino okerrago nengoen”

Puerto Operazioak zein eragin izan zuen erretiroan?

Gauza arraro xamarra izan zen hura, noizbait jakingo da. Operazio hori dela eta talde gabe gelditu ginen, babesle gabe, eta txirrindularitzako kodigo etikoaren ondorioz, zeinak dioen dopin usaina badago txirrindulariak badaezpada ezin direla kontratatu, ezin ginen beste talde batera joan. Hori izan zen gure egoera. Gauzak pilatu ziren. Gorputz aldetik nioena baino okerrago nengoen, ez nintzen ondo sentitzen, ez nuen gogorik, banituen beste ardura batzuk, eta gainera Puerto Operazioa eta bere ondorioak… Esan nuen, amaitu da! Denbora arrazoia ematen ari zaigu, alegia, polizia operazio hura batzuen intereserako maniobra izan zen. Txirrindularitza negozioa da, hori dago atzean.

2007an esan zenuen txirrindularitzaren heriotza zetorrela. Berresten duzu hori?

Bai, bistan da. Betidanik esan dut txirrindulariak zirku handi bateko pailazoak besterik ez ginela. Erabiltzen gintuztela lasterketetara joateko zirkuan parte hartzera. Gainbehera iragarri nuen eta bost urte pasata horretan berresten naiz, adibidea Contadorrekin gertatutakoa. Zirku honen pastela banatzen da eta txirrindulariak gero eta zati txikiagoa dugu. Txirrindularien kolektiboa indarra galtzen ari da. Hau da, langile bezala ez dute negoziatzeko indarrik.

Kostatu zitzaizun erretiroa hartzea?

Bai, nahi izan nuen dena luzatu… luzatu… luzatu… Ez nintzen gaizki ibili 2005eko Espainiako Vueltan, eta horrek lagundu ninduen ikaragarri. Baina ez nintzen lehengo Joseba Beloki. Goizero jaikitzen nintzen entrenatzeko eta ikusita bi urte lehenago egiten nuena eta orduan egiteko nuena… hori asimilatzea ez da erraza.

Oharra: Arazo teknikoak medio, elkarrizketa honen bideoa ezin izan dut argitaratu, ezta zenbait galdera ere.

Lantalan webgunearen bidez, EMUNek lan munduan euskara gehiago erabili nahi duten pertsonei eta enpresei laguntza eman nahi die. LanTaLan, lana euskalduntzeko.

Baliabideak eta tresnak izeneko atala goitik behera berritu ondoren horrela geratu zaigu:

Euskara plana zer da?

Euskararen kudeaketa aurreratua

Lanean euskaraz bizi:

• Zer egin …? eskuliburua
• Agiri ereduak
• Euskara zuzenerako arau eta aholkuak
• Hiztegiak
•  Euskarazko softwarea
• Diru laguntzak

Lantalan webgunea:

• Hizkuntza harrerarako gidaliburu praktikoa
• Koordinatzaileei egindako elkarrizketak
• Oinarrizko artikuluak

#sarekohizkuntzak

Antzeko beste sarrera batzuk:

• Euskara planak garatzeko hizkuntza teknikariak behar ditu Emunek

Erroma aurreko GURE zibilizazioa Iberiarra omen zen, behintzat hori diote Barakaldoko Udalak eta La Caixak egiten duten erakusketa baten propagandan.

Esandakoa; kontakizuna eraikitzen.

Bidegileak bildumaren 62., 63. eta 64 sortak aurkeztu ditu Kultura sailak. Sorta bakoitzean euskalgintzan garrantzitsuak izan diren 4 pertsonari buruzko liburuxka bana dago: 62. sortan, Juan Martin Hiribarren, Agosti Xaho, Bruno Etxenike eta Joseba Altunari buruzko biografiak topatuko ditugu. 63. sortan, Luis Bandres, Xabier Lete, Mario Onaindia eta Joxe Migel Bidador-i buruzkoak. Azkenik, 64. sortan, Antonio Tovar, Yuri Zytsar, Rudolf P.G. de Rijk eta Robert L. Trask-en ibilbideak ezagutuko ditugu.

(INFORMAZIOAREN LEIHOAREN albiste guztiak)

Antzeko beste sarrera batzuk:

• Eusko Jaurlaritzak EAEko V. Inkesta Soziolinguistikoaren emaitza nagusiak aurkeztu ditu
• Elebide zerbitzuaren iazko emaitzak eta publizitate kanpaina berria aurkeztu ditu Jaurlaritzak
• Haur eta gazteentzako liburu-bilduma aurkeztu dute Eusko Jaurlaritzak eta Galtzagorri elkarteak

Have you ever lost your way
Have you ever feared another day
Have you ever misplaced your mind
Watching this world leave you behind (Ben Harper)

Google enpresak egindako Model your Town lehiaketaren irabazleak, 2012 urtean, Josetxo Perez eta Pedro Domecq izan dira, Getariaren 3D maketa egiteagatik. ZuZeun eman genuen berria: Getaria sei finalisten artean aukeratua izan zen apirilean. Orain, internet zaleen botoei esker, Getaria da irabazlea. Beste bost lehiakideak baino bozka gehiago lortu ditu Getariaren 3D maketak, 49.000 boto hain zuzen ere. Bejondeiela!

Googlek azaldu duenez, lanaren truke 25.000 euro jasoko ditu Getariako eskola publikoak eta, esker onez, Josetxo eta Pedrori ospakizuna eskainiko diote. Zorionak Josetxori, Pedrori eta getariar guztiei!

Mikel Mesonero MONDRAGON UNIBERTSITATEko Enpresagintzako graduondoko koordinatzailea da, eta berak azalduko digu Oñatin eta Irunen kokatuta dagoen Fakultate honen Unibertsitate Masterren eskaintzaren ezaugarri nagusiak.

Bolognako prozesuarekin bat datozen Unibertsitate masterrak beharrezkoak dira? Lau edo bost urte ikasten eman ostean, zergatik master bat egin?

Galdera ona. Bolognako prozesuarekin batera graduak martxan jarri ziren orain dela urte batzuk. Graduak, normalean, orotariko orientazioa izan dute, ikasleei ate ezberdinak zabaltzen dizkienak. Unibertsitate masterrak, normalean, espezializaziora daude zuzenduta. Espezializazio hau ezagutzetan (Finantzak edo Marketin digitala, adibidez) nahiz sektoreetan (Turismo aktiboan, esate baterako gure kasuan) koka daiteke.

Gaur eguneko egoeraren aurrean, ikaslearentzat espezializazio honek lan merkatuan posizionamendu bat lortzeko bide bat izan daiteke, eta ezberdintasun puntu bat eman diezaioke.

Finantzak, Marketina eta Turismo Aktiboa aipatu dituzu. Arlo hauei buruzkoak dira Enpresagintzan ikasi daitezkeen Unibertsitate Master guztiak?

Ez, hauek bakarrik ez. Gure eskaintza zabalagoa da. Hurrengo urtera begira bost master ofizial ditugu:

• MBA – Enpresa Zuzendaritza Masterra
• Enpresa Kooperatiboen Kudeaketan Unibertsitate Masterra
• Kontabilitate eta Finantza Zuzendaritzako Unibertsitate Masterra
• Marketing Digitala Unibertsitate Masterra eta
• Turismo Aktiboaren Enpresak Sortu eta Kudeatzea Unibertsitate Masterra

Lehenengo biak, batez ere, jada lanean ari diren profesionalei zuzenduriko Masterrak dira. Enpresa ikasketarik ez dituzten, baina enpresan jardun nahi duten ikasleentzat ere oso egokiak izan daitezke; esate baterako, Zuzenbidea edo Soziologia egin duen ikasle batentzat.

Kontabilitate eta Finantza Zuzendaritzako Masterra, bere aldetik, edozein erakundeko Kontabilitate edo Finantza saila gestionatzeko gaitzen du ikaslea. Gaur egungo globalizazio prozesuaren baitan, enpresek aurre egiten dituzten erronkei erantzuteko finantza-arloa ondo menperatzen dituzten profesionalak behar dituzte.

Marketing Digitala unibertsitate masterra, ekonomia digitalean ari diren enpresen Marketing saila kudeatzeko gaitzen du ikaslea. Internet eta teknologiak eskaintzen dituzten aukerak aprobetxatzen jakin behar dute enpresak, eta horretarako ondo prestatutako profesionalak behar dituzte.

Azkenik, Turismo Aktiboaren Enpresak Sortu eta kudeatzen Unibertsitate Masterrak beste motatako espezializazio bat eskaintzen du. Kasu honetan, ezagutza arlo bat baino, sektore batean espezializatzen du ikaslea. Turismoa sektore estrategikoa izanik, bertan sortuko diren aukerak aprobetxatu ahal izateko gaitzen du master honek.

Masterren aukera hain zabala izanik, zeintzuk dira Enpresagintzak eskaintzen dituen berezitasun edo abantailak?

Lehenik eta behin, eta beste ezaugarrien gainetik, praktikotasuna. Gure masterrak ekintzari bideratutako masterrak dira. Ezagutza tresna bat da, baina ez helburua. Ikasleak enpresa edo erakundeen errealitatea ezagutuko du, eta horrela ikasle orok praktika edo proiektu bat egin beharko dute enpresa batean.

Bestalde, ikaslea bere ikaste prozesuaren jabe izango da. Bidea markatu baino, gure lana bide hori egiten eta ikasleak duen potentzialtasuna guztia garatzen laguntzea da.

Azkenik, enpresa munduan geroz eta inportanteagoak diren gaitasun pertsonalak landuko ditugu, besteak beste: talde-lanean aritzea, ekintzailetasuna, arazoei aurre egitea edo lidergoa. Gaitasun hauek ez dira normalean jorratzen modu arautu batean, eta etorkizuneko lan merkatuko profesionalentzat ezinbestekoak izango dira.

Euskal Herria Kirolakeko bozeramailea den Jon Esturok horrela hitz egin du, gaur Miramar Jauregian emandako aurkezpen prentsaurrekoan. Berekin izan ditu, Biarritzeko Pierre Bousquier zuzendari admnistratiboa, Imanol Harinordoqui, Arnaud Heguy eta Dimitri Yachvili jokalariak, eta Baionako Philippe Rugieri taldeko presidenteordea, Manu Merin taldeko administratzailea eta Aretz Iguiniz, Jeanjo Marmouiet eta Marc Baget jokalariak. Euskal Federazioaren elkarlanean adierazle, berriz, bertan egon da Joxemi Galdos zuzendari teknikoa.
Esturok Euskal Herri Kirola zer den gogoratuz hasi du prentsaurrekoa, “Euskal Herri Kirola, Euskal Herriko kirolariok sortutako elkartea da, kirolarien bilgunea, Euskal Herria kulturala eta Euskal Herria kirolaria oinarri hartzen duena”. Haren logoak ere hori adierazten duela nabarmendu du, “ideologietatik haratago, kolore guztietako Euskal Herria” kontutan hartzen dituena, ligak, kopak eta txapelketak antolatzean.
Ekimen horrekin Euskal Herria Kirolak errugbia ezagutarazi nahi du, baita haren jarduera sustatu ere. “Goi mailako ikuskuzin bat eskaini nahi dugu, errugbia erakargarri bihur dadin haurrentzat, eta errugbian aritzeko ausartu daitezen”. Ildo beretik, Bidasoaren bi aldeetako taldeen arteko harremanak indartu nahi ditu. Horren harira Esturok argi utzi du, abuztuaren 3ko ekimena partidu bat baino gehiago dela, Euskal Herriko errugbiaren besta eguna izan behar duela. Hori dela eta, ahalik eta talde gehien bilduko dituen jaia prestatzen ari direla aurreratu du, besta bat non nahi duten talde guztiek haien burua ezagutarazteko aukera izango duten.
Datorren urterako kopa izan daitekeen simulazio bat ere aurkeztu du, bertan Baiona eta Biarritzez gain, Ordizia, Donibane Lohitzune, Hernani, Bera Bera, Gernika, Maule, Getxo eta Nafarroa bezalako taldeak agertzen dira. Hala ere, Esturok argi utzi nahi izan du, abuztuaren 3ko jaia eta datorren urteko kopa antolatzeko, Euskal Herria Kirolak errugbi talde guztien ekarpen eta iritziak jaso nahi dituela. “Datozen urteetarako kopa egitura osoa antolatzeko ardura hartu nahi dugu denon artean”.
Bukatzeko Euskal Herri Kirolako bozeramaileak berretsi du koparen helburua Euskal Herriko talde hoberena izendatzea dela, baina benetako garailea Euskal Herriko errugbia izan behar dela.
Sarrerak dagoeneko salgai daude www.ehkirola.org .

Frantziako Errepublikako presidente berria da François Hollande, Nicolas Sarkozy-ren ordez. Izendatzea gaur burutu da Eliseo jauregian, ohiko protokoloa segiz. Presidente berriak, François Hollandek, militarren dominen eta boteretsuen gorbaten artean egin du bere hitz aspertua. Miloika pertsonek ikus dezakete François Holldanderen hitzaldia sarean.

Baina, begia eta belarria nonbait jarri nahi nahi izanez gero, PC Jupiter aretoa litzateke lekurik onena. Izan ere, bertan bildu dira, kamera eta mikrofonoetatik oso urrun, Sarkozy, Hollande eta Benoit Puga jenerala. Le Monde egunkariak “Errepublikako sekreturik handiena” izendatutakoa eman dio ordu horretan presidente ohiak Hollanderi; kode nuklearra, alegia. Ordu erdi izan dituzte horretarako.

Bitarte horretan, estatuko sekretuak esateaz gain, Sarkozyk Hollanderi lehergai nuklearra aktibatzeko “giltza” eman dio. ”Kode sekretua ez da lau zenbakiko PIN kode bat orri zuri batean. Konbinazio konplexu bat da, presidenteak bakarrik piztu dezakeena”, Le Figaron Bruno Tertrais militarrak azaldutakoaren arabera. Kode horrek neurgailu biometrikoak erabiltzen ditu, ez dago argi hatz-marka, ahotsa edo begi ninia erabiltzen den horretarako. Gainera, kode ezberdinak dituzte erasoaren nolakotasunaren arabera.

Kodeaz gain, diotenez, Frantziako presidenteak soinean daraman maleta beltzean gordetzen dute lehergaia aktibatzeko komunikazio sistema. Horregatik, une oro darama maleta beltza bere ondoan.

Potentzia nuklearra

• Frantziak lau urpekari atomiko ditu eta baita lehergailuak botatzeko prest dauden gerra hegazkinak ere. Lurretik ere bonba atomikoa jaurtitzeko ahalmena izan zuen, orain gutxi arte.
• 2006 urtean Jacques Chirac presidenteak arma nuklearrak erabiltzeko mehatxua egin zuen, eraso terrorista egin ziezaiokeen edozein estaturi erantzun gisa.
• Gaur egun, 290 arma atomiko ditu Frantziak, erabiltzeko prest, nahiz eta 2008 urtean lehergai atomikoak murrizteko konpromisoa hartu zuen.
• 1960an erabili zuen lehenbizikoz Frantziak lehergai atomiko bat. Saharako basamortuan izan zen, Gerboise Bleu izeneko lehergaiarekin.

Antzeko beste sarrera batzuk:

• Iranen aurkako eraso militarra hasteko ahaleginetan ari dira Amerikako Estatu Batuetan
• Zergatik ez diote Libiakoari gerra deitzen?