Gure smartphoneen bidez eta Screach aplikazioari esker, dendako katalogo birtualetara sartzeko aukera izango dugu eta kristalaren beste aldean gustatu zaigun jantzi hori erosi. Horretarako, dendek 3M-k fabrikatutako film mehe bat itsatsi beharko dute kristalean, pantaila holografiko bihur dadin, eta denda birtuala sortuko duen ordenagailu eta proiektore bat instalatu. PayPalen esanetan, dendek egin beharreko inbertsioa 2.000 euro baino gutxiagokoa izango da.

Erakusleihoko screach kodea sartzean, erakuslehioko pantaila berehala piztuko da eta telefonoarekin sinkronizatu egingo da. Orduan, erabiltzaileak katalogoarekin elkarreragiteko aukera izango du, produktua aukeratu eta ordaindu PayPal bidez.

Proiektua urte amaierarako prest egotea espero dute Erresuma Batuan, eta Europako beste herrialdeetan 2013an zehar.

Helburua: kontsumo jarraitua

Internet sortu baino lehenago, erosketak ohiko dendetan egiten ziren, kalean, dendari baten zerbitzuarekin, ordutegi jakin baten barruan. Katalogo bidez erosteko aukera ere bazegoen, baina ez zen ohikoena. Interneten zabaltzearekin batera eta denda birtualen sorrerarekin, erosteko ordutegiak desagertu egin dira eta kontsumitzaileok geuk nahi dugunean eros dezakegu ordenagailuaren bidez. Eta orain smartphonekin, ordenagailuan ez ezik, kalean edo geure telefonoarekin gauden tokian eros dezakegu.

Paypalek beste muga bat hautsi du: denda fisikoetara ordutegiz kanpo sartzea. Enpresa amerikarraren helburua kontsumitzaileek “nahi duten momentuan, nahi duten tokian eta hobe datorkien moduan” erostea nahi du. Horregatik, “online eta offline merkataritzarenartean dauden mugak” desegin nahi ditu.

• Malware batek 232 ordenagailu infektatzen ditu.
• 2,6 milioi CD eta 1.820 TB datu sortzen dira.
• 450 Windows 7 CD saltzen dira.
• 12 webgune hackeatzen dira eta 416 saiakera egoten dira.
• 950 erosketa baino gehiago egiten dira eBayen, eta 180 baino gehiago smartphone bidez.
• 219.000 dolarretako erosketak egiten dira PayPal bidez, eta 10.000 smartphone bidez.
• 103 BlackBerry saltzen dira.
• 11 milioi solasaldi gertatzen dira bat-bateko mezularitzan.
• 2 milioi erabiltzaile daude on line pornografia ikusten.
• Googlek 75.000 dolar irabazten ditu.
• 2.100 check-in egiten dira Foursquare sare sozialean.
• 2.500 tinta kartutxo saltzen dira.
• 4.000 USB gailu saltzen dira.
• 38 tona e-zabor sortzen dira.
• 18 Kindle Fire saltzen dira amazon.com-en.
• 11 Xbox 360 bideo-kontsola saltzen dira.
• 81 iPad eta 925 iPhone 4S saltzen dira.
• 710 ordenagailu saltzen dira. Horietako 555, Intel.

[Zer gertatzen da interneten 60 segundotan?]

Nerabeak eta euskara

Nerabeen hizkuntza erabilera, euskararen normalizazioan dabiltzanen interesgune nabarmena da, gaur egun. Hezkuntza-sistemak euskararen ezagutza bermatzean bertatik igarotako belaunaldien bizimodua euskaraz garatuko zela aurreikusi zutenen ustea ez da bete, erabat behintzat. Herrian eta etxean euskararen presentzia esanguratsurik aurkitzen ez duten nerabeek euren arteko harremanetan eta, orokorrean, eskolaz kanpoko bizitzan, gaztelaniarako joera erakusten dute sarri.­

Horrez gain, garrantzitsua da aipatzea euskaraz dakien nerabearen profil soziolinguistikoa aldatu egin dela duela urte batzuetatik hona. Euskara bigarren hizkuntzatzat duten euskaldunen proportzioa gero eta altuagoa da. Era berean, hiri-inguruneetan bizi diren euskaldunak ere gero eta gehiago dira. Ezaugarri horiek aldatu diren moduan, euskara erabiltzeko motibazioetan ere bilakaera bat ematen ari dela antzeman daiteke.

Nerabeak eta sare sozialak

Interneteko sare sozialak, azken urteetan sarean agertutako fenomeno berrietako bat dira. Pertsonen arteko komunikaziorako erabilgarriak dira, harreman asko eskura edukitzea eta informazioa modu errazean trukatzea ahalbidetuz. Gaur egun 12 eta 18 urte artean dituzten nerabeen belaunaldia bete-betean harrapatu du interneteko sare sozialen orokortzeak. Euren arteko komunikaziorako tresna garrantzitsuenetakoa bihurtu da, argazkiak, mezuak, hitzorduak eta loturak bat-batean eta dohainik jende askori zabaltzeko aukera ematen dutelako. 

Sare sozial hauek nerabe eta haurren artean izan duten arrakastaz oharturik, hainbat saiakera egin dira tresna hauek helburu batzuen mesedetan erabiltzeko. Esate baterako, facebook, tuenti edo twitter bidez produktu eta zerbitzuen publizitatea egiten da, hezkuntzarako baliabide bezala erabiltzen saiatzen dira edo herritarrak kazetari bilakatzera bideratzen dira. 

Nerabeak, sare sozialak eta euskara

Soziolinguistika Klusterra eta Kultur Kabia-Topagunea elkarlanean aritu gara gai hauen inguruan. Kultur Kabiak nerabeei zuzendutako hainbat aisialdi programa kudeatzen ditu. Programa hauetako bakoitzak bere ezaugarri bereizgarriak baditu ere, denetan erabiltzen dira interneteko sare sozialak nerabeen arteko harremanak eta nerabeek programaren arduradunekin dituztenak ahalbidetzeko. Interneteko sare sozialena fenomeno berria izanik eta adin-tarte jakin batzuetan duten arrakasta kontuan harturik, interesgarri ikusten da tresna hauei ematen zaien erabilera hobeto ezagutzea. Izan ere, aurrera begira euskara sustatzeko baliabide eraginkorra izan litezke, egoki erabiliz gero.

Hau guztia kontuan izanik, hurbilpen gisa balio dezakeen esperientzia bat burutu da ondorengo bi helburuekin:

- Batetik, aisialdi programetan sare sozialen bidez nerabeen euskararen erabileran eragitea

- Eta beste alde batetik, hizkuntza-portaeratan sare sozialen bidez eragiteko esku hartzeen baliagarritasuna aztertzea

Egitasmoaren ezaugarriak, emandako urratsak eta lortutako emaitzak, Soziolinguistika Klusterra eta Topagunea Euskara Elkarteen Federazioaren webguneetan eskuragarri dagoen txostenean daude azalduta.

SOZIOLINGUISTIKA KLUSTERRA eta KULTUR KABIA-TOPAGUNEA

http://www.soziolinguistika.org/nerabeaksaresozialak

http://www.topagunea.org/dokumentazioa/ikerketak/2

Zerga-erreformaren gaineko iradokizunik egin nahi duzu? EAE hobe funtzionatzeko ideiarik duzu? Adi, Patxi Lopezek belarriak zabalik baititu. Eusko Jaurlaritzaren Irekia – Gobierno abierto webgunean, lehendakariak hiritarren partaidetzarako dokumentu ireki bat aurkeztu du guztion artean fiskalitaterik onena lortzeko helburuz. “Herritarrek ere iritzia eman dezakete, ideiak ekarri eta iradokizunak egin”, dio Lopezek.

Webgunean azaltzen dutenez, “bakoitzak ahal duen neurrian eta bere errentaren arabera gizarteari ekarpena egitea eta iruzurrari aurre egitea du helburu, besteak beste”.

Modu horretan, enplegua sustatzea, gizarte politikak garatzea, erakundeen bikoiztasunak deuseztatzea eta fiskalitate zuzenagoa eta bidezkoagoa lortzea espero du lehendakariak.

Ideiak, printzipioz, ez du itxura txarra: euskal herritarron artean zerga-sistema perfektu eta orekatu bat lortzea. Utopia hutsa ote?

Ideiarik gabe geratu ote da ala benetan herritarrok politikan zuzenean parte hartzen dugun mundu perfektu baterantz goaz? Hau da, benetako demokrazia baterantz -Demos, herria + krátos, boterea-. Zenbateraino izango ditu kontuan geure proposamenak?

Egia da, egun teknologia berriek ematen duten aukerekin, herritarren ahotsa inoiz baino ozenago entzuten dela eta parte hartzeko aukerak biderkatu egin direla. Zenbait politikari aukera hori aprobetxatzen hasi dira. Rubalcabak, adibidez, twitterlarien galderei erantzun zien uztailean eta Egiptoko presidenteak Facebook bidez herritarrei galdetu zien ea zeintzuk ziren gobernu berrian ikusi nahi zituzten ministroen izenak .

Eremu ikusezina: EiTB nahieran from Kapuko Aldizkaria on Vimeo.

Orain dela hilabete batzuk martxan jarri zenetik bisita ugari jaso ditu Euskal Irrati Telebistak martxan jarri duen proiektu berritzaile honek. Kapuko aldizkariak erreportaje bat egin du nola lan egiten duten erakusteko.

Telebista 2.0 aplikazio honekin, Hamaika telebistak egunero, pantailan informazio ezberdina automatikoki kudeatu eta eskainiko du. Euskal hedabideetako RSS jario eta informazioa zuzenean, eguraldiaren berri zuzenean, trafikoa, itsasoko berri, twitter kontu ezberdinen jarraipena, webgune ezberdinetako nabegazioak… Berrikuntza itzela gure panoramarako.

Ez dugu inguruan hori egiten duen beste telebistarik ezagutzen, eta asko poztu gaitu albisteak. Horrenbeste, saio berezi bat egin dugula horren inguruan 11amaika telebistako Ane Zabala kazetariarekin batera.

Sareko euskal hedabideak

Sustatu, Zuzeu.com, berria.info, Argia, umap.eu, zabaldu.com guneetako edukiak, automatikoki ikusiko dira telebista pantailan. Nabegazioak, rss jarioa, azken berriak… Orain arte, euskal sareko edukiak sozializatzeko ezagutzen dugun aplikaziorik handiena da dudarik gabe. Gainera, zuzenean editatzen ibili barik, modu automatikoan egiten ditu lanok Telebista 2.0 aplikazio honek.

Albisteak 2.0 aurrera begira

Pozik gabiltza gu 11amaika telebistan. Programa egiten hasi ginenetik, teknologia berriek ze garrantzia eta garapen izan duten ikusteak, poztu besterik ezin gaitu egin. Sare sozialetan presentzia areagotu da, elkarrizketa digitalean parte hartzen ari dira Hamaikako kazetari eta langileak, teknologia berrien gaineko gai eta albisteak normaltasun osoz lantzen dira euskarazko telebista honetan.

Gure saioa erreferentzia bilakatu da sarean bezala telebistan ere. Saio ireki, partehartzaile, libre eta anitza dela deritzogu, eta 2.0 aro honetan ia ziento erdi programa egin ostean, uste dugu bide bat urratu dugula. Eta hobetzea dagokigu aurrerantzean.

albisteak 2.0 @  hamaika.tv

Godrej and Boyce enpresak, idazmakinak egiten jarraitzen zuen munduko enpresa bakarrak (Mumbai, India), produkzioa eten du eta stockean pieza gutxi batzuk utzi ditu soilik. Idazmakinak ikaragarrizko iraultza izan ziren eta XX. mendeko bulegoetako ezinbesteko tresna izan ziren, baina ordenagailuen zabaltzearekin haien tekla hotsa isilduz joan zen.  Hala ere, nahiko erabiliak izan dira Indian duela gutxi arte. Baina azken hamar urteetan eskaria jaitsi egin da.

“XXI. Mende hasieratik ordenagailuak zabaltzen hasi ziren eta munduko idazmakina fabrikatzaileek produkzioa eten zuten, guk izan ezik”, adierazi du Milind Duklek, enpresako gerenteak.

Lehen idazmakina komertziala AEBetan produzitu zen 1867an. Godrej and Boyce enpresak 1950ean ekin zion produkzioari, Jawaharlai Nehru lehen ministroak idazmakina Indiako ingeniaritza askatasunaren eta industrializazioaren sinbolo gisa deskribatu zuenean.

Hona hemen, beraz, bildumazaleentzat eta nostalgikoentzat gelditu den azken altxorra. Etxeko ganbaran idazmakinarik baduzu, jakin XX. mendeko historia idazten lagundu zuen eta jada fabrikatzen ez diren tramankulu berezi horietako bat duzula.

Lerro amaiera.

Guk Albisteak 2.0 telebista saioan, Japonia eta Euskal Herriaren arteko loturetan sakondu dugu. Euskaraz mintzo den japoniarra ezagutu, eta Japon bereziki maite duten euskaldunen blogetan murgildu gara.

Zaleak hemen
Eta sarean topatu ditugun japoniar kulturari buruzko hemengo blogekin, flipatu egin dugu. Asko dira Japoniako gaiak lantzen dituztenak, han bizi izan direlako, bertan bizi eta euskaraz idazten dutelako, bertako joko edo ohiturak maite dituztelako edo auskalo zergatik gehiago. Egia dena da, japoniar kulturak jarraitzaile asko dituela, baita gurean ere.

Euskal musika han
Mundu global honetan gainera, gero eta ohikoagoa da euskal taldeek ere mundu mailako birak eta kontzertuak egitea, eta aspaldion asko izan dira japoniarren aurrean jo duten euskal musikari eta taldeak: Fermin Muguruza, Berri Txarrak, Alaitz eta Maider, Zea Mays, Gose….  Arrasateko hirukoteak Japonian grabatutako bideoarekin agurtu dugu telebista saioa. Bideo Gomendio aproposa iruditu zaigu bukaerarako. 

albisteak 2.0 webtv libre eta euskalduna  [hamaika.tv + euskalherrian.info]

Librezaleren foroa euskarazko software librearen inguruko zalantzak eta ideiak partekatzeko tresna garrantzitsua bihurtu da azken urte hauetan. Orain aurpegia garbitu diogu eta orain arte bete duen funtzioa betetzen jarraitzea nahi genuke. Webgune berrian garrantzi berezia eman diogu aplikazio informatikoak euskaratzeko prozesuaren azalpenari. Lokalizazio-gida izeneko atalean lan horretan hasi nahi duenak edo gehiago sakondu nahi duenak informazio baliagarria aurkituko du.

Lan-tresnak atalean, bestalde, euskaratzeak egiteko erabil daitezkeen hainbat aplikazio, formatu eta baliabide azaltzen dira. Honi lotuta, Librezalek Pootle web aplikazioa dauka instalatuta bere zerbitzarian, itzulpenak auzolanean bideratzeko. Librezale parte-hartze irekiko taldea da: edozeinek har dezake parte inolako arazorik gabe eta bakoitzak ahal duen neurrian. Ez dugu egitura finkorik eta gure komunikazio-tresnak webgunea, foroa eta posta-zerrendak dira.

Elkarrizketa eta eztabaida nagusia Librezale posta-zerrendan ematen da. Lagundu nahi baduzu, hainbat moduz egin dezakezu: itzulpenak egiten, foroetan agertzen diren zalantzak argitzen, euskaratutako aplikazioak sustatzen… Begiratu webguneko Parte hartu nahi duzu? atala informazio gehiagorako.

Baina kontuan izan gure filosofia. Jatorri eta ikuskera askotako lagunak ari gara Librezalen eta denok ere oinarrizko printzipio batzuk jarraitzen ditugu:

• Aplikazio informatikoak euskaraz edukitzeko lan egiten dugu.
• Software librea lehenesten dugu, askatasun gehien ematen duena delako.
• Gure lanak ere lizentzia libreekin banatzen ditugu, egindako lana etorkizunerako ere baliagarria izatea nahi dugulako.
• Zubiak eraiki behar direnez, plataforma anitzetan dabiltzan programak lehenesten ditugu.
• Estandar eta formatu irekien alde egiten dugu, aukerak aukera, elkar ulertzeko ezinbestekoak direlako.

Librezaleren izaerarekin bat datozen tresna informatikoak hobetsi ditugu webgune berria egiteko. Orririk gehienak wiki eran osatu ditugu MediaWiki aplikazioa erabiliz, tresna honek bistako abantailak eskaintzen baitizkigu librezale guztiok elkarlanean aritzeko. Horrez gain, WordPress erabili dugu albisteak kudeatzeko eta FluxBB aukeratu dugu foroa zaharberritzeko. Gurekin lan egin nahi baduzu, bisita gaitzazu: librezale.org